Buker alan müsəlman xanım kimdir?

Coha Əl Harthi 1978-ci ildə Omanda doğulub və təhsiliniOmanda və Birləşmiş Krallıqda alııb. Klassik ərəb ədəbiyyatı üzrə Edinburq universitetində doktorluq dərəcəsi qazanıb. Sultan Qabus Universitetində ərəb dili kafedrasının dosentidir. Coha Əl Harthi bədii əsərlərdən başqa tərcümələrin və dərsliklərin müəllifidir.

Buker mükafatına layiq görülmüş “Səmavi bədənlər” kitabından başqa yazıçının “Narıncı”, “Sevgi təəssüratı”, “Damdakı oğlan” hekayələr kitabları, “Bulud arzuları” və “Quş yuvaları” uşaq kitablarının, 3 romanın müəllifidir. İndiyədək 10 kitabı çap olunub. Əsərləri ingilis, alman, koreya, serb, italyan dillərinə tərcümə olunub və bu dildə olan dərgilərdə çap olunub.

“Narıncı” hekayəsinə görə Sultan Qabus ədəbiyyat mükafatına mükafatına layiq görülb. Buker almış “Səmavi bədənlər” əsəri 2010-cu ildə Omanın ən yaxşı hekayəsi seçilib. “Quş yuvaları” kitabısa Omanın ən yaxşı uşaq kitabı adını alıb.

Buker mükafatına layiq görülən “Səmavi bədənlər” əsərini ingilis dilinə Merilin But çevirib. Merilin But Okford universitetində ərəb dilindən dərs verir. Xatırladaq ki, qaydalara görə, 50 min funt sterlinq pul mükafatının tən yarısı tərcüməçiyə çatacaq.

“Səmavi bədənlər” yazıçının Omandakı vətəninin postkolonial dövründən bəhs edir. Əsərin süjetində Omanın Əl Avafi kəndində yaşayan üç bacının hekayəsi dayanır. Bunlardan biri Abdullaha ərə gedən qırıq qəlbli Maya, biri borcluluq hissi ilə evlənən Əsma, o biri Kanadaya gedən sevgilisinin qayıtmağını gözləyən Xəvlədir. Bu üç bacının hekayəsi ilə oxucu Omanın ənənəvi quldarlıq cəmiyyətindən mürəkkəb müasirliyə keçidini izləyir.

“Roman elqant bir strukturla bir ailənin itkiləri və sevgisi üzərindən Omanın yetkinləşməsindən bəhs edir” -deyə Buker təşkilatçıları deyir.

“Roman bizim ümumi tariximizin narahat məqamlarını və incə bir ustalığı nümayiş etdirir. O, cins, irq və quldarlıq klişelərinə dirəniş göstərmək mövzusuna metaforalar təqdim edir.” – deyə jüri sədri Bettani Hyuz romanı şərh edərkən deyib.

Xatırladaq ki, Coha Əl Harthi Buker mükafatı uğrunda beş seçilmiş müəlliflə mübarizə aparıb: fransız Anni Erno, alman Marion Poşman, polyak Olqa Tokarçuk, kolumbiyalı Xuan Qabriel Vaskes və çilili Alluko Trabbuko Zeran.

 

Mənbə: /kulis.az/

Aydınlığa Doğru İB | Copyright © 2015

Created by ONNEKS LAB